*ఇప్పటికీ నేను బీఆర్ఎస్ ఎమ్మెల్యేనే.!** అభివృద్ధి కోసమే ముఖ్యమంత్రిని కలిశా..* జగిత్యాల ఎమ్మెల్యే సంజయ్ కుమార్ స్పష్టం—–*

నేటి సాక్షి – జగిత్యాల బ్యూరో*( రాధారపు నర్సయ్య )ఇప్పటికీ తాను బీఆర్ఎస్ పార్టీ ఎమ్మెల్యేగానే కొనసాగుతున్నానని కోరుట్ల ఎమ్మెల్యే సంజయ్ కుమార్ స్పష్టం చేశారు. జగిత్యాల మోతె కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడుతూ, కేవలం నియోజకవర్గ అభివృద్ధి కోసమే ముఖ్యమంత్రిని కలిశానని, దానిని రాజకీయంగా వక్రీకరించడం సరికాదని పేర్కొన్నారు.*కాంట్రాక్టర్ల బిల్లులు – అనవసర రాద్ధాంతం*గత ప్రభుత్వ హయాంలో ప్రారంభమై పూర్తయిన పనులకు సంబంధించిన కాంట్రాక్టర్ల బిల్లులు అన్నింటినీ ఇప్పించినట్లు ఎమ్మెల్యే తెలిపారు. బిల్లులు పొందిన వారిలో కొందరు తనకు వ్యతిరేకంగా ఎన్నికల్లో పనిచేసిన వారూ ఉన్నారని చెప్పారు. సమీకృత మార్కెట్ ఖాళీగా ఉండటంతోనే ఒక కాంట్రాక్టర్ అక్కడ తన మెటీరియల్ నిల్వ చేసుకున్నాడని, ప్రతి గ్రామంలో కాంట్రాక్టర్లు ఏదో ఒకచోట మెటీరియల్ నిల్వ చేసుకోవడం సాధారణమేనని, దీనిపై పెద్ద రాద్ధాంతం చేయాల్సిన అవసరం లేదన్నారు.*రెసిడెన్షియల్ జోన్ అంశంలో ద్వంద్వ వైఖరి*మంచాల కృష్ణ పెట్రోల్ బంక్ అంశంలో అనవసరంగా తన పేరును లాగుతున్నారని ఎమ్మెల్యే సంజయ్ కుమార్ ఆవేదన వ్యక్తం చేశారు. కాంతి భవన్ నుంచి నూర్ మసీదు వరకు రెసిడెన్షియల్ జోన్‌గా ఉందని, పాత బస్టాండ్ నుంచి మిషన్ కంపౌండ్ వరకు కూడా అదే జోన్ పరిధిలోనే ఉన్నప్పటికీ అక్కడ నిర్మించిన దుకాణ సముదాయాలు ఎవరి హయాంలో కట్టారని ప్రశ్నించారు. సీనియర్ నాయకులకు కేవలం ఒక పెట్రోల్ బంక్ మాత్రమే కనిపిస్తోందని, అయితే తనకు అన్ని అక్రమాలూ కనిపిస్తున్నాయని, అయినా అందరినీ ఇబ్బంది పెట్టలేనని వ్యాఖ్యానించారు.*రోడ్డు విస్తరణ – మాస్టర్ ప్లాన్ పోరాటం*యావర్ రోడ్డు విస్తరణ కోసం 100 ఫీట్లకు అనుమతి తీసుకువచ్చినట్లు ఎమ్మెల్యే తెలిపారు. మాస్టర్ ప్లాన్ విషయంలో ఎంత గొడవ జరిగిందో ప్రజలకు తెలుసునని గుర్తుచేశారు. ఇవన్నీ కేవలం నియోజకవర్గ అభివృద్ధి కోసమే చేసిన ప్రయత్నాలేనని స్పష్టం చేశారు.*పార్టీ మార్పు ప్రచారం – దాడులు చేసినా మౌనం*తాను బీఆర్ఎస్ పార్టీ తరఫున ఎమ్మెల్యేగా గెలిచానని, ఇప్పటికీ అదే పార్టీలో కొనసాగుతున్నానని ఎమ్మెల్యే మరోసారి స్పష్టం చేశారు. అభివృద్ధి కోసం ముఖ్యమంత్రిని కలిసినంత మాత్రాన పార్టీ మారుతున్నట్టు స్థానిక బీఆర్ఎస్ నాయకులు తనపై దుష్ప్రచారం చేశారని, తన ఆసుపత్రి, ఇంటిపై దాడులు కూడా చేశారని ఆరోపించారు. అయినప్పటికీ తాను ఎప్పుడూ పార్టీ అధిష్టానాన్ని గానీ, స్థానిక నాయకులను గానీ విమర్శించలేదన్నారు.*ఇంటిగ్రేటెడ్ స్కూల్‌కు రూ.200 కోట్లు*నియోజకవర్గ అభివృద్ధి కోసం ఇకపై కూడా ముఖ్యమంత్రిని కలుస్తానని ఎమ్మెల్యే తెలిపారు. ముఖ్యమంత్రి, మంత్రులు అన్ని విధాలుగా సహకరిస్తున్నారని చెప్పారు. కోరుట్ల నియోజకవర్గంలో ఇంటిగ్రేటెడ్ స్కూల్ కోసం రూ.200 కోట్ల నిధులు మంజూరు చేయించానని వెల్లడించారు. కోరుట్ల, సిరిసిల్ల, కరీంనగర్‌లలో ఎక్కడా ఇలాంటి ఇంటిగ్రేటెడ్ స్కూల్ లేదని అన్నారు.*మున్సిపల్ ఎన్నికల్లో కాంగ్రెస్‌కు మద్దతు పిలుపు*తనను విమర్శిస్తున్నారని తాను తిరిగి విమర్శించే వ్యక్తిని కాదని, ఎవరికీ భయపడనని ఎమ్మెల్యే సంజయ్ కుమార్ స్పష్టం చేశారు. అభివృద్ధి కోసమే ప్రభుత్వంతో కలిసి పనిచేస్తున్నానని, అందుకే రాబోయే స్థానిక మున్సిపల్ ఎన్నికల్లో కాంగ్రెస్ పార్టీ అభ్యర్థులను గెలిపించాలని కోరుతున్నట్లు తెలిపారు.ఈ విలేకరుల సమావేశంలో ఎమ్మెల్యే సంజయ్ కుమార్‌తో పాటు మాజీ మున్సిపల్ చైర్మన్ గిరి నాగభూషణం, గోలి శ్రీనివాస్, సమిండ్ల శ్రీనివాస్ తదితర నాయకులు, కార్యకర్తలు పాల్గొన్నారు._____