*గోదావరి నది తీరం పరిశీలించిన జిల్లా కలెక్టర్** పారిశుధ్య పనులపై అధికారులకు పలు సూచనలు* సామాజిక ఆరోగ్య కేంద్రం ఆకస్మిక తనిఖీ————————*

నేటి సాక్షి – ధర్మపురి*( రాధారపు నర్సయ్య )జగిత్యాల జిల్లా కలెక్టర్ బి. సత్యప్రసాద్ సోమవారం ధర్మపురి పట్టణంలో పర్యటించి గోదావరి నది తీరంలోని పలు ప్రాంతాలను పరిశీలించారు. గోదావరి తీరం వద్ద పారిశుధ్య పరిస్థితులను సమీక్షిస్తూ అక్కడ నిర్వహిస్తున్న శుభ్రత పనులను పరిశీలించారు. ఈ సందర్భంగా పరిసర ప్రాంతాల్లో ఎక్కడా చెత్త పేరుకుపోకుండా మున్సిపల్ అధికారులు ప్రత్యేక చర్యలు తీసుకోవాలని సూచించారు. గోదావరి తీరం వద్దకు ప్రతిరోజూ పెద్ద సంఖ్యలో భక్తులు, సందర్శకులు వచ్చే నేపథ్యంలో నిత్యం శుభ్రత పనులు నిర్వహిస్తూ ప్రజలకు స్వచ్ఛమైన వాతావరణాన్ని కల్పించాలని ఆదేశించారు.*పారిశుధ్యంపై ప్రత్యేక దృష్టి*గోదావరి తీర ప్రాంతాల్లో చెత్తను సమయానికి తొలగించడం, అవసరమైన చోట చెత్త బుట్టలను ఏర్పాటు చేయడం, ప్రజల్లో పరిశుభ్రతపై అవగాహన కల్పించడం వంటి చర్యలు చేపట్టాలని కలెక్టర్ సూచించారు. గోదావరి తీరం పరిసర ప్రాంతాలు ఎప్పటికప్పుడు పరిశుభ్రంగా ఉండేలా మున్సిపల్ సిబ్బంది క్రమం తప్పకుండా పర్యవేక్షణ చేయాలని ఆదేశించారు. 2027లో గోదావరి పుష్కరాలు రానున్న నేపథ్యంలో నది తీర ప్రాంతాల్లో పారిశుధ్య నిర్వహణతో పాటు స్నాన ఘాట్ల అభివృద్ధిపై ముందస్తుగా తగిన చర్యలు చేపట్టాలని అధికారులకు సూచించారు.*సామాజిక ఆరోగ్య కేంద్రం ఆకస్మిక తనిఖీ*అనంతరం ధర్మపురి పట్టణ కేంద్రంలోని సామాజిక ఆరోగ్య కేంద్రాన్ని జిల్లా కలెక్టర్ ఆకస్మికంగా తనిఖీ చేశారు. ఆసుపత్రిలో అందిస్తున్న ఓపీ సేవలు, ఐపీ సేవలు, ల్యాబ్ రికార్డులు, ఐపీ రికార్డులు, మెడికల్ ఫార్మసీ తదితరాలను పరిశీలించారు. ఆసుపత్రికి వచ్చిన రోగులతో నేరుగా మాట్లాడి వారికి అందుతున్న వైద్య సేవల గురించి వివరాలు తెలుసుకున్నారు.*వైద్య సేవలు మెరుగుపరచాలని ఆదేశం*ఆసుపత్రిలో వైద్య సేవలు మరింత మెరుగుపరచాలని, డాక్టర్లు సమయపాలన పాటిస్తూ విధులు నిర్వహించాలని జిల్లా కలెక్టర్ సూచించారు. రోజుకు ఎన్ని ఓపీ కేసులు వస్తున్నాయో వివరాలు అడిగి తెలుసుకున్నారు. డెంగ్యూ, వైరల్ ఫీవర్ వంటి సీజనల్ వ్యాధులను దృష్టిలో ఉంచుకుని అవసరమైన మందులు అందుబాటులో ఉండేలా చూడాలని అధికారులకు ఆదేశించారు. అలాగే ఆసుపత్రిలో ఎక్కడా గడువు ముగిసిన మందులు ఉండకుండా క్రమం తప్పకుండా తనిఖీలు నిర్వహించాలని సూచించారు.*ఆసుపత్రి పరిసరాలు పరిశుభ్రంగా ఉండాలి*సామాజిక ఆరోగ్య కేంద్రం పరిసర ప్రాంతాలు ఎల్లప్పుడూ పరిశుభ్రంగా ఉండేలా చూడాలని, రోగులకు మంచినీటి సౌకర్యాలు కల్పించాలని కలెక్టర్ పేర్కొన్నారు. ఆసుపత్రిలో చేరిన రోగులకు నాణ్యమైన ఆహారం అందించేలా అవసరమైన ఏర్పాట్లు చేయాలని కూడా సూచించారు.ఈ పరిశీలనలో రెవెన్యూ డివిజనల్ అధికారి మధుసూదన్, జిల్లా ఆస్పత్రి కోఆర్డినేషన్ అధికారి డాక్టర్ రామకృష్ణ, మున్సిపల్ కమిషనర్, ఎమ్మార్వో, ఆసుపత్రి సిబ్బంది మరియు ఇతర అధికారులు పాల్గొన్నారు.__________