*తెలంగాణ ‘గృహజ్యోతి’ గోల్ మాల్.!** కల్లూరు గ్రామంలో 32 రోజుల ‘బిల్లింగ్ దోపిడీ దందా’ వెలుగులోకి * సామాన్యుల జేబుకు కత్తెర* ఉచిత విద్యుత్ వాగ్దానం.. 200 యూనిట్ల జీరో బిల్ ఎక్కడా.? * 32 రోజుల సైకిల్ ట్రిక్..స్లాబ్ ఛార్జ్‌లతో రూ.500 అదనం * డిస్కామ్ vs విద్యుత్ వినియోగదారులు* ఇది డేటా ఎర్రరా.? లేదా ఉద్దేశపూర్వక ఆలస్యమా.? * లాభం ఎవరికి? నష్టం ఎవరికి.? రూ.1,775 కోట్ల ఆదా కలలోనే.!—

*నేటి సాక్షి – కోరుట్ల*( రాధారపు నర్సయ్య )తెలంగాణలో ‘గృహజ్యోతి’ పథకం కింద సాగుతోన్న ‘బిల్లింగ్ దందా’..కోరుట్ల మండలం కల్లూరు గ్రామంలో వెలుగులోకి వచ్చింది.! ‘గృహజ్యోతి’ పథకం పేరుతో సాగుతున్న ‘బిల్లింగ్ బండారం’ రాష్ట్రవ్యాప్త చర్చనీయాంశంగా మారింది. 200 యూనిట్ల వరకు ఉచిత విద్యుత్ అని ప్రకటించిన ప్రభుత్వం… 32 రోజులకోసారి బిల్లు కొట్టి, అర్హులైన బిపిఎల్ కుటుంబాల నుంచి నెలకు రూ.200-500 వసూలు చేస్తూ డిస్కామ్‌లు ‘స్లాబ్ ట్రిక్’తో ఆదాయం పెంచుకుంటున్నాయి. ఇది కేవలం డేటా లోపమా.? లేక ప్రభుత్వ సైలెంట్ ఆమోదంతో జరుగుతున్న దోపిడీనా? అన్నదానిపై ‘నేటిసాక్షి’ అందిస్తోన్న పూర్తి రిపోర్ట్.!*’గృహజ్యోతి’ పథకం ఉద్దేశ్యం.!*తెలంగాణ కాంగ్రెస్ 2023 ఎన్నికల మేనిఫెస్టోలో ‘గృహ జ్యోతి’ పేరుతో ప్రకటించిన ఉచిత విద్యుత్ పథకం 2024 మార్చి 1 నుంచి అమలులోకి వచ్చింది. వైట్ రేషన్ కార్డు ఉన్న ప్రతి కుటుంబానికి నెలకు 200 యూనిట్ల వరకు జీరో బిల్ ఇస్తామని ప్రభుత్వం హామీ ఇచ్చింది. ఇప్పటివరకు తెలంగాణ వ్యాప్తంగా 5.11 కోట్ల కుటుంబాలకు జీరో బిల్లులు జారీ అయినట్టు అధికారులు చెబుతున్నారు. కానీ..గ్రామాలు..పట్టణాలు.. మున్సిపల్ పరిధిలోని పేదలకు ఈ హామీ కేవలం కాగితంపైనే ఉంది. ఆధార్-కస్టమర్ ఐడి లింక్ లేకపోవడం, ప్రజా పాలన అప్లికేషన్లలో డేటా ఎంట్రీ తప్పులు..ఇవన్నీ సామాన్యుల జేబును ఖాళీ చేస్తున్నాయి.!*32 రోజుల బిల్లింగ్ ట్రిక్-సాంకేతికత కాదు, ఆర్థిక దందా*సాధారణంగా విద్యుత్ బిల్లింగ్ 30 రోజుల సైకిల్‌లో జరగాలి. కానీ.. మీటర్ రీడర్లు 29 నుంచి 32 రోజులకోసారి..ఆ తర్వాత రీడింగ్ తీస్తున్నారు. ఫలితం.? 0-50 యూనిట్ల స్లాబ్‌లో ఉండాల్సిన వినియోగం 51-100 స్లాబ్‌కు చేరి, రూ.2.60 నుంచి రూ.4.30 వరకు యూనిట్ ఛార్జ్ పడుతోంది. ఒక్కో ఇంటికి నెలకు రూ.200-500 అదనం భారం పడుతోంది. టిఎస్ఎస్పిడిసిఎల్ అధికారులు ‘సైకిల్ డిలే సహజం’ అని సాకులు చెబుతున్నా, బిఆర్ఎస్ నాయకులు ‘ఇది ప్రభుత్వం రోల్‌బ్యాక్ పాలసీ’ అని ఆరోపిస్తున్నారు.*తప్పు ఎవరిది.? మీటర్ రీడర్ నుంచి ప్రభుత్వ పెద్దలవరకు బాధ్యతల గందరగోళం*మీటర్ రీడర్ కేవలం వినియోగం రికార్డ్ చేస్తాడు. బిల్ జనరేషన్ డిస్కామ్ సర్వర్‌లో జరుగుతుంది. ‘గృహ జ్యోతి’ అర్హత ఆధార్ లింక్, రేషన్ కార్డు వెరిఫికేషన్‌పై ఆధారపడి ఉంటుంది. ప్రజా పాలన పోర్టల్‌లో 2.5 లక్షల అప్లికేషన్లు ఇంకా పెండింగ్‌లో ఉన్నాయి. ఎన్నికల మోడల్ కోడ్, సిబ్బంది కొరత..ఇవన్నీ ఆలస్యానికి కారణాలుగా చెబుతున్నారు. కానీ ఫీల్డ్ లెవల్‌లో ఎఇలు, డిఇలు ‘పైనుంచి ఆర్డర్ లేదు’ అని చేతులు ఎత్తేస్తున్నారు. ప్రభుత్వం సబ్సిడీ చెల్లిస్తోంది కానీ అమలు డిస్కామ్‌ల చేతుల్లోనే ఉంది.*లాభ-నష్ట లెక్క-డిస్కామ్ ఖజానాకు రూ.కోట్లు.. ప్రజలకు రూ.లక్షల భారం* అర్హులు జీరో బిల్ పొందకపోతే డిస్కామ్‌లకు అదనపు రెవెన్యూ. ఒక్కో ఇంటికి రూ.1,500-2,000 సంవత్సరం అదనం వస్తే, రాష్ట్రవ్యాప్తంగా 50 లక్షల బిపిఎల్ కుటుంబాలకు రూ.1,775 కోట్ల ఆదా కావాల్సినవి… ఇప్పుడు డిస్కామ్ ఖాతాలోకి వెళ్తున్నాయి. ప్రభుత్వం సబ్సిడీ ఖర్చు తగ్గినా, ఎన్నికల వాగ్దానం గాలికొదిలినట్టు అయింది. పేదింటి వినియోగదారులు ఒక్కో ఇల్లు నెలకు రూ.300 సగటున చెల్లిస్తోంది – ఇది రైతు రోజుకూలీ కంటే ఎక్కువ.*పరిష్కార మార్గం-1912 హెల్ప్‌లైన్ నుంచి రిటర్న్ ఫైలింగ్ వరకు* ‘గృహజ్యోతి’ వినియోగదారులు టిఎస్ఎస్పిడిసిఎల్ హెల్ప్‌లైన్ 1912కి కాల్ చేసి, బిల్ రసీదు, రేషన్ కార్డు, ఆధార్‌తో స్థానిక ఎఇ కార్యాలయంలో ఫిర్యాదు చేయవచ్చు. ఆన్‌లైన్‌లో tgsouthernpower.orgలో ‘గ్రీవెన్స్ రిజిస్టర్’ ఆప్షన్ ఉంది. పెండింగ్ అరియర్స్‌కు రీఫండ్ కోసం రసీదు సమర్పించాలి. ప్రభుత్వం డేటా ఆడిట్, ఆటోమేటెడ్ లింకింగ్ ప్రక్రియ ప్రారంభించాలని నిపుణులు సూచిస్తున్నారు. లేకపోతే ‘గృహ జ్యోతి’ కేవలం ఎన్నికల గీతంగానే మిగిలిపోతుంది.!__________