ధాన్యం కొనుగోలు కేంద్రాలు సిద్ధం చేయండి వీడియో కాన్ఫరెన్స్ లో మంత్రుల ఆదేశాలు• రైతులకు ఎటువంటి ఇబ్బందులు రాకుండా ముందస్తు చర్యలు• రాష్ట్రవ్యాప్తంగా 8342 కొనుగోలు కేంద్రాలు సిద్ధం• గన్నీలు, తూకం, తేమ పరికరాలు తప్పనిసరిగా ఉంచాలి

నేటి సాక్షి – జగిత్యాల*( రాధారపు నర్సయ్య )—–ఖరీఫ్‌ సీజన్‌లో రాష్ట్రవ్యాప్తంగా వరి ధాన్యం కొనుగోలు ప్రక్రియను పకడ్బందీగా ప్రారంభించేందుకు ప్రభుత్వం ఆదేశాలు జారీ చేసింది.రైతులకు ఇబ్బందులు రాకుండా, కేంద్రాల్లో అన్ని మౌలిక వసతులు సిద్ధంగా ఉండేలా జిల్లా కలెక్టర్లు సమన్వయం చేయాలని మంత్రి ఉత్తమ్ కుమార్ రెడ్డి స్పష్టంగా తెలిపారు.*రైతుల సౌకర్యమే ప్రాధాన్యం*హైదరాబాద్‌ నుండి వీడియో కాన్ఫరెన్స్‌ ద్వారా మంత్రులు ఉత్తమ్ కుమార్ రెడ్డి, తుమ్మల నాగేశ్వర్ రావు, చీఫ్‌ సెక్రటరీ రామకృష్ణ రావు రాష్ట్రంలోని అన్ని జిల్లా కలెక్టర్లతో సమీక్ష నిర్వహించారు.వరి కొనుగోలు కేంద్రాల్లో గన్నీలు, తూకం యంత్రాలు, శుద్ధి పరికరాలు, టార్ఫాలిన్‌ వంటి వస్తువులు ముందుగానే అందుబాటులో ఉంచాలని ఆదేశించారు.రైతులు ధాన్యం తీసుకువచ్చిన వెంటనే వివరాలు ఆన్లైన్లో నమోదు చేయడం ద్వారా 48 గంటల్లో రైతు ఖాతాల్లో చెల్లింపులు జమయ్యేలా చూడాలని ఉత్తమ్‌ కుమార్‌ రెడ్డి తెలిపారు.”ప్రతి రైతు కష్టాన్ని గౌరవించే విధంగా ప్రభుత్వం చర్యలు తీసుకుంటుంది” అని అన్నారు.—*అకాల వర్షాలపై జాగ్రత్తలు*వ్యవసాయ శాఖ మంత్రి తుమ్మల నాగేశ్వర్‌ రావు మాట్లాడుతూ — “ప్రస్తుతం అకాల వర్షాల పరిస్థితి ఉండటంతో అధికారులు జాగ్రత్తలు తీసుకోవాలి. ధాన్యం తడవకుండా టార్ఫాలిన్‌లు ముందుగానే సిద్ధంగా ఉంచాలి” అని సూచించారు.అలాగే సన్న, దొడ్డు రకాల వడ్లను వేర్వేరు కేంద్రాల్లో కొనుగోలు చేయాలని ఆదేశించారు.”లారీలు, డ్రైవర్లు, కూలీల కొరత రాకుండా ముందస్తు ప్రణాళికలు చేయాలి. రైతులకు ఎటువంటి ఇబ్బందులు రాకుండా అధికారులంతా క్షేత్రస్థాయిలో పర్యవేక్షించాలి” అని తుమ్మల స్పష్టం చేశారు.*రాష్ట్రవ్యాప్తంగా 80 లక్షల టన్నుల కొనుగోలు లక్ష్యం*(ముఖ్య కార్యదర్శి రామకృష్ణ రావు)“ఈ వానాకాలంలో రాష్ట్రవ్యాప్తంగా 66.80 లక్షల ఎకరాల్లో వరి సాగు, కోటి 48 లక్షల మెట్రిక్ టన్నుల దిగుబడి అంచనా ఉందని తెలిపారు.8342 కొనుగోలు కేంద్రాల ద్వారా 80 లక్షల మెట్రిక్ టన్నుల ధాన్యం సేకరణ లక్ష్యంగా ప్రభుత్వం పనిచేస్తోంది” అన్నారు.గ్రేడ్-ఏ రకానికి రూ.2389, సాధారణ రకానికి రూ.2369, సన్న రకానికి అదనంగా రూ.500 బోనస్‌ ఇవ్వబడుతుందని తెలిపారు.”తేమ శాతం పై రైతులకు అవగాహన కల్పించి, నాణ్యమైన ధాన్యాన్ని మాత్రమే కొనుగోలు చేయాలి” అని రామకృష్ణ రావు స్పష్టం చేశారు.*జగిత్యాలలో 421 కేంద్రాలు సిద్ధం*జగిత్యాల జిల్లా కలెక్టర్‌ బి. సత్యప్రసాద్‌ మాట్లాడుతూ..“వానాకాలం ధాన్యం సేకరణకు 421 కొనుగోలు కేంద్రాలను ఏర్పాటు చేస్తున్నాం. ఇందులో 283 ఐకెపి, 137 మెప్మా ఆధ్వర్యంలో ఉండనున్నాయి” అన్నారు.జిల్లాలో 7.5 నుంచి 8 లక్షల మెట్రిక్ టన్నుల వరి ధాన్యం సేకరణ లక్ష్యంగా పని చేస్తున్నామని చెప్పారు.“రైతులు ఎటువంటి ఇబ్బందులు పడకుండా ప్రతి మండలంలో సమీక్షలు నిర్వహించి, కేంద్రాల ఏర్పాట్లను పర్యవేక్షిస్తాం” అని కలెక్టర్ తెలిపారు.రైతుల వివరాలను పీఓఎంఎస్‌లో ముందుగానే పొందుపరచడం ద్వారా చెల్లింపులు త్వరగా జరిగేలా చర్యలు తీసుకుంటామని వివరించారు.*గోడపత్రిక ఆవిష్కరణ*సమీక్ష అనంతరం కలెక్టర్‌ సత్యప్రసాద్‌ కనీస మద్దతు ధరల గోడపత్రికను ఆవిష్కరించారు.ఈ కార్యక్రమంలో అదనపు కలెక్టర్‌ లత, ట్రైనీ అదనపు కలెక్టర్‌ కన్నం హరిణి, డిఆర్డివో రఘువరన్‌, డిసివో మనోజ్‌ కుమార్‌, వ్యవసాయ, మార్కెటింగ్‌, రవాణా శాఖ అధికారులు పాల్గొన్నారు.____________