*పాత్రికేయుల సమస్యలపై పోరాటమే శరణ్యం** ప్రమాదం అంచున పత్రికా స్వేచ్ఛ* సమస్యలపై పోరాడే ఏకైక సంఘం టీడబ్ల్యూజేఎఫ్* సంఘం బలోపేతానికి సమిష్టి కృషి అవసరం*

నేటి సాక్షి – జగిత్యాల బ్యూరో*( రాధారపు నర్సయ్య )జర్నలిస్టుల హక్కుల సాధన, సమస్యల పరిష్కారానికి పోరాటమే ఏకైక మార్గమని తెలంగాణ వర్కింగ్ జర్నలిస్ట్స్ ఫెడరేషన్ (టీడబ్ల్యూజేఎఫ్) వ్యవస్థాపక అధ్యక్షుడు, రాష్ట్ర కన్వీనర్ మామిడి సోమయ్య స్పష్టం చేశారు. రాబోయే రోజుల్లో జర్నలిస్టులకు మరిన్ని గడ్డు పరిస్థితులు ఎదురవుతాయని, అందుకు అప్రమత్తమై ఫెడరేషన్ నాయకత్వంలో పోరాటాలకు సిద్ధం కావాలని ఆయన పిలుపునిచ్చారు. మంగళవారం హైదరాబాద్ రాంనగర్‌లోని రాజ్ ఫంక్షన్ హాలులో టీడబ్ల్యూజేఎఫ్ హైదరాబాద్ జిల్లా సన్నాహక సమావేశం జరిగింది.*ప్రమాదపు అంచుల్లో జర్నలిస్టుల హక్కులు*ఈ సమావేశంలో మామిడి సోమయ్య మాట్లాడుతూ, జర్నలిస్టుల హక్కులు తీవ్ర ప్రమాదపు అంచుల్లో ఉన్నాయని ఆందోళన వ్యక్తం చేశారు. పాలకులు జర్నలిస్టుల ఏ ఒక్క సమస్యను కూడా పరిష్కరించకుండా కాలయాపన చేస్తున్నారని ధ్వజమెత్తారు. తెలంగాణ రాష్ట్రం ఏర్పడిన తర్వాత రెండుసార్లు అధికారంలో కొనసాగిన గత ప్రభుత్వం జర్నలిస్టులను పూర్తిగా విస్మరించి తీరని అన్యాయం చేసిందని, ప్రస్తుత ప్రభుత్వం కూడా అదే బాటలో కొనసాగుతోందని విమర్శించారు.*అక్రెడిటేషన్లపై ఆందోళన*కాంగ్రెస్ ప్రభుత్వం అధికారంలోకి వచ్చి రెండేళ్లు గడిచినా జర్నలిస్టులకు కనీసం కొత్త అక్రెడిటేషన్ కార్డులు, హెల్త్ కార్డులు జారీ చేయలేకపోయిందని మామిడి సోమయ్య అన్నారు. రివ్యూ కమిటీ పేరుతో కాలయాపన చేసి చివరికి జర్నలిస్టులకు ఆందోళన కలిగించే జీవో 252ను జారీ చేసిందని ఆరోపించారు. రాబోయే ఒకటి, రెండు నెలలు జర్నలిస్టులకు అత్యంత కీలకమని, అక్రెడిటేషన్ కార్డులను భారీగా తగ్గిస్తారనే ప్రచారం జరుగుతోందని తెలిపారు. అక్రెడిటేషన్లు తగ్గిస్తే ఊరుకునేది లేదని, రాష్ట్రవ్యాప్తంగా ఉద్యమాలకు దిగుతామని హెచ్చరించారు.*జర్నలిస్టుల డిమాండ్లు*జర్నలిస్టులకు ఇండ్లు, ఇండ్ల స్థలాలు, పెన్షన్ స్కీం, హెల్త్ కార్డులు, జర్నలిస్టులపై దాడుల నివారణకు ప్రత్యేక కమిటీలు, జర్నలిస్టుల రక్షణకు ప్రత్యేక చట్టం వంటి డిమాండ్ల సాధనకై ఫెడరేషన్ ఆధ్వర్యంలో బలమైన పోరాటం చేయాలని మామిడి సోమయ్య పిలుపునిచ్చారు. మీడియా సంస్థలు, జర్నలిస్టుల సంఖ్య అధికంగా ఉన్న హైదరాబాద్ జిల్లాలో ఐక్యత కొరవడిందని, టీడబ్ల్యూజేఎఫ్ ద్వారా జర్నలిస్టుల ఐక్యతను బలోపేతం చేయాల్సిన అవసరం ఉందన్నారు.*ఫెడరేషన్ నాయకుల పిలుపు*ఫెడరేషన్ రాష్ట్ర కో-కన్వీనర్లు పులిపలుపుల ఆనందం, బండి విజయ్ కుమార్, తన్నీరు శ్రీనివాస్, సీనియర్ సభ్యులు బొల్లం శ్రీనివాస్, సీహెచ్ వీరారెడ్డి తదితరులు మాట్లాడుతూ, హైదరాబాద్‌లోని ఫెడరేషన్ వ్యవస్థాపక సభ్యులంతా ఐక్యంగా ముందుకు రావాలని, జర్నలిస్టుల సమస్యల సాధనకై రాబోయే రోజుల్లో చేపట్టే ఉద్యమాల్లో భాగస్వాములు కావాలని పిలుపునిచ్చారు.*టీడబ్ల్యూజేఎఫ్ జిల్లా అడ్‌హక్ కమిటీ ఏర్పాటు*ఈ సమావేశంలో టీడబ్ల్యూజేఎఫ్ హైదరాబాద్ జిల్లా అడ్‌హక్ కమిటీని ఏర్పాటు చేశారు. కమిటీ కన్వీనర్‌గా వి. రవికుమార్ (బీజే టీవీ)ను, కో-కన్వీనర్లుగా గజ్జల వీరేశం (సాక్షి), బి. గోపాల్ (ఆంధ్రజ్యోతి), వర్కాల కృష్ణయ్య (నమస్తే తెలంగాణ), కె. నర్సింగ్ రావు (సూర్య), ఆర్. వెంకటేశ్వర్లు (ఆంధ్రప్రభ), వి. శ్రీనివాస్ (మనం బ్యూరో), రాజేష్ గౌడ్ (వార్త), బి. శ్రీనివాస్ (ప్రజాజ్యోతి), ఎం. శ్రీశైలం (వాయిస్ టుడే), ఆర్. శ్రీనివాస్ గౌడ్ (సాక్షి డిజిటల్ న్యూస్), వెంకట్ (యామ్స్ న్యూస్ ఇంగ్లీష్ డైలీ), సీహెచ్ బ్రహ్మం (ఏబీ న్యూస్), వేణుగోపాల్ (హెచ్‌డీఎస్), పి. సంతోష్ (టీఆర్ 9 న్యూస్) తదితరులను నియమించారు.ఈ సందర్భంగా మామిడి సోమయ్య పలువురు నూతన జర్నలిస్టులకు టీడబ్ల్యూజేఎఫ్ హైదరాబాద్ జిల్లా సభ్యత్వాలను అందజేశారు. సమావేశంలో ఫెడరేషన్ రాష్ట్ర నాయకులు కె. పాండు రంగారావు, నాగరాజు, యర్రమిల్లి రామారావు, రఘురాం, హెచ్‌యూజే నాయకులు వర్కాల కృష్ణ, గజ్జల వీరేశం, ఎన్. సీహెచ్ రంగయ్య తదితరులు పాల్గొన్నారు.——