*మహిళా సంక్షేమం–మా ప్రభుత్వ ప్రాధాన్యత** మంత్రి అడ్లూరి లక్ష్మణ్‌కుమార్ వెల్లడి * కోరుట్లలో ఇందిరా మహిళా శక్తి చీరల పంపిణీ —

*నేటి సాక్షి – కోరుట్ల*( రాధారపు నర్సయ్య )కోరుట్లలో నిర్వహించిన ఇందిరా మహిళా శక్తి చీరల పంపిణీ కార్యక్రమంలో రాష్ట్ర సంక్షేమ శాఖ మంత్రి అడ్లూరి లక్ష్మణ్‌కుమార్ పాల్గొన్నారు. కోరుట్ల ఎమ్మెల్యే కె.సంజయ్, జగిత్యాల జిల్లా కలెక్టర్ బి.సత్యప్రసాద్ చేతుల మీదుగా పెద్ద సంఖ్యలో మహిళలకు చీరలు అందజేశారు. మహిళా సంఘాలు నిర్ణయించిన గ్రామ, మండల సమాఖ్యల ద్వారా పంపిణీ వ్యవస్థను నడుపుతూ ప్రతి మహిళకు చీరలు చేరేలా ప్రభుత్వం చర్యలు తీసుకుంటోందని మంత్రి వివరించారు. మహిళల్లో ఐక్యత, ఆత్మవిశ్వాసం పెంచే దిశగా ఈ కార్యక్రమం ముందుకు సాగుతోందని ఆయన చెప్పుకొచ్చారు.—*ఆర్థిక స్వావలంబన కోసం ప్రభుత్వ చర్యలు*మహిళలు ఆర్థికంగా ఎదగేలా వడ్డీ లేని రుణాలపై వడ్డీని ప్రభుత్వం భరిస్తున్న నేపథ్యంలో రైస్ మిల్లులు, సోలార్ ప్లాంట్లు, క్యాంటీన్లు, బస్సుల కొనుగోలు, పెట్రోల్ బంకుల ఏర్పాటు వంటి వ్యాపార రంగాల్లో మహిళా సంఘాలకు అవకాశాలు విస్తరించాయని మంత్రి గుర్తుచేశారు. ఆడబిడ్డల ఆశీర్వాదం సమాజాన్ని ముందుకు నడిపించే శక్తి అని అభిప్రాయపడ్డారు. ముఖ్యమంత్రి రేవంత్ రెడ్డి నాయకత్వంలో మహిళా సంక్షేమం కీలక ప్రాధాన్యత పొందుతోందని ఎమ్మెల్యే సంజయ్ కూడా హైలైట్ చేశారు. అర్హులైన మహిళలందరికీ చీరలు చేరేలా స్థానిక సమన్వయం బలోపేతం చేయాల్సిన అవసరాన్ని ఆయన సూచించారు. ప్రభుత్వం అందిస్తున్న అవకాశాలను సద్వినియోగం చేసుకుని మహిళలు ఉన్నత స్థాయికి ఎదగాలని ప్రజాప్రతినిధులు ఆకాంక్ష వ్యక్తం చేశారు.—*పారదర్శక పంపిణీపై అధికారుల దృష్టి*చీరల పంపిణీ కార్యక్రమాన్ని వేగంగా, పారదర్శకంగా పూర్తి చేయాల్సిన అవసరాన్ని జిల్లా కలెక్టర్ బి.సత్యప్రసాద్ సూచించారు. చీరలు అందుకున్న మహిళల వివరాలు, ఫోటోలను మొబైల్ యాప్‌లో అప్లోడ్ చేసే ప్రక్రియను ఖచ్చితంగా అమలు చేయాలని ఆయన అధికారులు, సిబ్బందికి సూచించారు. ఈ కార్యక్రమంలో ఆర్డీవో జీవాకర్ రెడ్డి, డి.ఆర్డీవో రఘువరన్, ఎమ్మార్వో కృష్ణచైతన్య, ఎంపిడివో రామకృష్ణ, స్థానిక ప్రజాప్రతినిధులు, గ్రామ–మండల సమాఖ్య ప్రతినిధులు పెద్ద సంఖ్యలో పాల్గొన్నారు. చీరల పంపిణీకి వచ్చిన మహిళలు కార్యక్రమాన్ని విజయవంతం చేశారు._______