*సీఎం’వా..? రియల్ ఎస్టేట్ బ్రోకర్’వా..!?** కోరుట్ల ఎమ్మెల్యే డాక్టర్ సంజయ్ సంచలన ఆరోపణలు* జగిత్యాలలో బీఆర్ఎస్ మీడియా సమావేశం * రేవంత్ ప్రభుత్వంపై తీవ్ర విమర్శలు

*నేటి సాక్షి – జగిత్యాల*( రాధారపు నర్సయ్య )జగిత్యాల జిల్లా కేంద్రంలోని బీఆర్ఎస్ పార్టీ కార్యాలయంలో సోమవారం నిర్వహించిన మీడియా సమావేశంలో కోరుట్ల శాసనసభ్యులు డాక్టర్ కల్వకుంట్ల సంజయ్ తెలంగాణ ముఖ్యమంత్రి రేవంత్ రెడ్డిపై తీవ్ర స్థాయిలో మండిపడ్డారు. కాంగ్రెస్ ప్రభుత్వం ప్రజల కోసం కాకుండా స్కాముల కోసమే పరిపాలన సాగిస్తోందని ఆయన ఆరోపించారు. ముఖ్యమంత్రి రేవంత్ రెడ్డి రియల్ ఎస్టేట్ బ్రోకర్ అవతారం ఎత్తి ప్రభుత్వ ఆస్తులను అమ్మకానికి పెడుతున్నారనే వ్యాఖ్యలు రాష్ట్ర రాజకీయ వర్గాల్లో తీవ్ర సంచలనం రేపాయి.*రూ.40 వేల కోట్ల కంచె-గచ్చిబౌలి భూ స్కాం ఆరోపణ*హైదరాబాద్ నగరంలోని కంచె-గచ్చిబౌలి ప్రాంతంలోని సుమారు 400 ఎకరాల విలువైన ప్రభుత్వ భూమిని ఎకరాకు రూ.100 కోట్ల రేటుతో అమ్మేందుకు ప్రభుత్వం కుట్ర పన్నుతోందని డాక్టర్ సంజయ్ ఆరోపించారు. ఈ ఒక్క డీల్‌తోనే రూ.40 వేల కోట్లకు పైగా భారీ స్కాం జరగనుందని ఆయన హెచ్చరించారు. ఈ భూములు గతంలో ప్రభుత్వ ఆస్తులుగా ఉండగా, ఇప్పుడు ప్రైవేటు రియల్టర్లకు బంపర్ లాభాలు అందేలా కాంగ్రెస్ నేతలు కుమ్మక్కయ పడుతున్నారని ఆయన ఆగ్రహం వ్యక్తం చేశారు.*ఫార్మాసిటీ 14 వేల ఎకరాలు – ఫ్యూచర్ సిటీ పేరుతో భారీ కుట్ర*ఫార్మా సిటీ కోసం గత బీఆర్ఎస్ ప్రభుత్వం కేటాయించిన 14 వేల ఎకరాల భూమిని ఇప్పుడు ‘ఫ్యూచర్ సిటీ’ పేరుతో పూర్తిగా రియల్ ఎస్టేట్ వ్యాపారులకు కట్టబెట్టేందుకు రేవంత్ సర్కారు సిద్ధమైందని సంజయ్ ఆందోళన వ్యక్తం చేశారు. ఈ ప్రాజెక్టు పేరుతో రూ.లక్ష కోట్లలో ఆదాయం వచ్చే అవకాశం ఉన్నప్పటికీ, అదంతా ప్రజల జేబులకు కాకుండా కాంగ్రెస్ నేతల సన్నిహితుల జేబుల్లోకి వెళ్తుందని ఆయన ఆరోపించారు.*మెట్రో రైలు, మెట్రో భూములపైనా కన్ను*హైదరాబాద్ మెట్రో రైలు ప్రాజెక్టు కోసం రూ.11 వేల కోట్ల అదనపు ఖర్చు చేసి ప్రజలపై భారం మోపుతున్నారని, అదే సమయంలో నగరంలోని 280 ఎకరాల మెట్రో భూములను కూడా రియల్ ఎస్టేట్ వ్యాపారులకు దోచిపెట్టేందుకు కాంగ్రెస్ ప్రభుత్వం సిద్ధమైందని డాక్టర్ సంజయ్ విమర్శించారు. ఈ భూముల మార్కెట్ వాల్యూ ప్రస్తుతం రూ.30 వేల కోట్లకు పైగానే ఉంటుందని ఆయన అంచనా వేశారు.*రెండేళ్లలోనే రూ.5 లక్షల కోట్ల దోపిడీ*రేవంత్ రెడ్డి ముఖ్యమంత్రిగా బాధ్యతలు చేపట్టి రెండేళ్లు కావొస్తున్న నేపథ్యంలో రెండు సంవత్సరాల రాష్ట్ర బడ్జెట్‌కు సమానమైన దాదాపు రూ.5 లక్షల కోట్ల దోపిడీకి పాల్పడ్డారని కల్వకుంట్ల సంజయ్ తీవ్ర ఆరోపణలు చేశారు. అభివృద్ధి పేరుతో ప్రభుత్వ భూముల అమ్మకాలు తప్ప ప్రజలకు ఏమీ జరగలేదని, ఈ డబ్బు అంతా కాంగ్రెస్ నేతల సొంత జేబుల్లోకి వెళ్తోందని ఆయన ఆవేదన వ్యక్తం చేశారు.*యువతను ప్రశ్నించమని పిలుపు*ఈ అక్రమాలన్నీ బయటపెట్టి, ప్రజల ఆస్తులను కాపాడుకోవాల్సిన బాధ్యత యువతపై ఉందని డాక్టర్ సంజయ్ పిలుపునిచ్చారు. రాష్ట్ర భవిష్యత్తును రియల్ ఎస్టేట్ మాఫియాకు కట్టబెట్టే ప్రయత్నాలను అడ్డుకోవాలని ఆయన కోరారు.*రాష్ట్రవ్యాప్తంగా ఉద్ధృతమవుతున్న భూ కుంభకోణ చర్చ*గత కొన్ని వారాలుగా హైదరాబాద్ అవుటర్ రింగ్ రోడ్ పరిధి నుంచి ఫార్మాసిటీ వరకు ప్రభుత్వ భూముల అమ్మకాలపై బీఆర్ఎస్, బీజేపీ నేతలు నిరసనలు చేపడుతున్నారు. రూ.లక్ష కోట్లకు పైగా స్కాములు జరిగే అవకాశం ఉందని విపక్షాలు ఆందోళన వ్యక్తం చేస్తుండగా, కాంగ్రెస్ నేతలు మాత్రం ఇవన్నీ అభివృద్ధి కోసమేనని, బీఆర్ఎస్ హయాంలో జరిగిన దోపిడీ కంటే పారదర్శకంగా జరుగుతోందని స్పందిస్తున్నారు. హైదరాబాద్‌లో బీఆర్ఎస్ నిర్వహించనున్న నిరసన కార్యక్రమంతో ఈ వివాదం మరింత ఉద్ధృతమవుతుందనే అంచనాలు వ్యక్తమవుతున్నాయి._____