గంగాపూర్ దేవాలయం, రెబ్బెన – జాతర ఏర్పాట్లను పరిశీలించిన ఎస్పీ నితికా పంత్

నేటి సాక్షి, కుమురం భీమ్ ఆసిఫాబాద్: జిల్లా పోలీస్ సూపరింటెండెంట్ శ్రీమతి నితికా పంత్, ఐపీఎస్, గారు రెబ్బెన మండలంలోని గంగాపూర్ దేవాలయాన్ని సందర్శించి, రానున్న జాతరను శాంతియుతంగా, సాఫీగా నిర్వహించేందుకు చేపట్టిన ఏర్పాట్లను పరిశీలించారు.ఈ సందర్భంగా ఎస్పీ గారు దేవాలయ ప్రాంగణంతో పాటు పరిసర ప్రాంతాలను పరిశీలించి, జాతరను విజయవంతంగా నిర్వహించేందుకు తీసుకోవాల్సిన చర్యలపై సంబంధిత అధికారులకు స్పష్టమైన ఆదేశాలు జారీ చేశారు. గుంపుల నియంత్రణ, ట్రాఫిక్ నిర్వహణ, భద్రతా ఏర్పాట్లు, అత్యవసర సేవలు, భక్తులకు అవసరమైన మౌలిక సదుపాయాలపై ప్రత్యేక దృష్టి సారించాలని సూచించారు.అలాగే ప్రవేశ, నిష్క్రమణ మార్గాలు, పార్కింగ్ ప్రాంతాలు, ఊరేగింపు మార్గాలు, సున్నిత ప్రాంతాలలో తగిన పోలీస్ బందోబస్తు ఏర్పాటు చేయాలని ఆదేశించారు. భక్తులకు ఎలాంటి అసౌకర్యం కలగకుండా దేవాలయ కమిటీతో పాటు సంబంధిత ఇతర శాఖలతో సమన్వయం చేసుకుని పనిచేయాలని తెలిపారు.జాతరను శాంతియుతంగా, క్రమబద్ధంగా నిర్వహించేందుకు అవసరమైన అన్ని ఏర్పాట్లు చేపడుతున్నామని ఎస్పీ నితికా పంత్ గారు తెలిపారు. పోలీసులకు సహకరించి, వారి సూచనలను పాటించడం ద్వారా జాతర విజయవంతానికి తోడ్పడాలని ప్రజలను కోరారు.ఈ కార్యక్రమంలో రెబ్బెన సీఐ సంజయ్, ఎస్సై వెంకటకృష్ణ, ఆలయ నిర్వాహకులు తదితరులు పాల్గొన్నారు.