*మున్సిపల్ ఎన్నికల కౌంటింగ్‌కు సర్వం సిద్ధం** ఐదు మున్సిపాలిటీల ఓట్ల లెక్కింపుకు ఎస్‌.కె.ఎన్.ఆర్ డిగ్రీ కళాశాలలో కేంద్రం* జగిత్యాల జిల్లా కలెక్టర్, ఎస్పీ సమీక్ష – పటిష్ట భద్రతా చర్యలు* పారదర్శకంగా కౌంటింగ్ నిర్వహణకు మార్గదర్శకాలు—*

నేటి సాక్షి – జగిత్యాల బ్యూరో*( రాధారపు నర్సయ్య )జగిత్యాల జిల్లాలో నిర్వహించిన రెండవ సాధారణ మున్సిపల్ ఎన్నికలకు సంబంధించిన కౌంటింగ్ ప్రక్రియ కోసం అన్ని ఏర్పాట్లు పూర్తి చేసినట్లు జిల్లా యంత్రాంగం ప్రకటించింది. జిల్లాలోని ఐదు మున్సిపాలిటీల ఓట్ల లెక్కింపును జగిత్యాల ఎస్‌.కె.ఎన్.ఆర్ డిగ్రీ కళాశాలలో నిర్వహించనున్నారు. కేంద్రంలో కౌంటింగ్ టేబుళ్ల అమరిక, సిబ్బంది కేటాయింపు, నియంత్రణ గదుల ఏర్పాటు వంటి ఏర్పాట్లు పూర్తి స్థాయిలో చేపట్టినట్లు అధికారులు తెలిపారు.జిల్లా కలెక్టర్, ఎస్పీ పరిశీలన – భద్రతపై ప్రత్యేక దృష్టి*కౌంటింగ్ కేంద్రాన్ని జిల్లా కలెక్టర్ బి. సత్యప్రసాద్, జిల్లా ఎస్పీ అశోక్ కుమార్ కలిసి పరిశీలించారు. భద్రతా ఏర్పాట్లపై ప్రత్యేక దృష్టి సారించాలని సంబంధిత అధికారులకు సూచించారు. కేంద్రంలో ఏర్పాటు చేసిన సీసీ కెమెరాల పనితీరును పరిశీలించి, ప్రతి టేబుల్ వద్ద నియమించిన సిబ్బంది బాధ్యతలను వివరించారు. స్ట్రాంగ్ రూమ్ భద్రతను స్వయంగా తనిఖీ చేసి, ఈవీఎంల భద్రతా ప్రమాణాలను అధికారులు సమీక్షించారు.*పారదర్శక కౌంటింగ్ – ఏజెంట్లకు సౌకర్యాలు*కౌంటింగ్ ప్రక్రియను పూర్తిగా పారదర్శకంగా నిర్వహించాలని కలెక్టర్ ఆదేశించారు. అభ్యర్థుల ఏజెంట్లకు తగిన సౌకర్యాలు కల్పించాలని సూచించారు. ఎన్నికల నియమావళి కచ్చితంగా అమలు చేయాలని, ఎటువంటి అవాంఛనీయ సంఘటనలు చోటుచేసుకోకుండా చర్యలు తీసుకోవాలని అధికారులను ఆదేశించారు. ఫలితాల ప్రకటనలో ఆలస్యం లేకుండా తక్షణ చర్యలు తీసుకోవాలని స్పష్టం చేశారు.*పోలీసు బందోబస్తు – అత్యవసర సేవలు సిద్ధం*కౌంటింగ్ కేంద్రం వద్ద పటిష్టమైన పోలీసు బందోబస్తు ఏర్పాటు చేసినట్లు ఎస్పీ తెలిపారు. కౌంటింగ్ రోజున శాంతిభద్రతల పరిరక్షణకు ప్రత్యేక బృందాలను నియమించినట్లు వెల్లడించారు. మీడియా ప్రతినిధుల కోసం ప్రత్యేక గదిని ఏర్పాటు చేయడంతో పాటు అత్యవసర వైద్య, విద్యుత్, అగ్నిమాపక సేవలు సిద్ధంగా ఉంచినట్లు పేర్కొన్నారు.ప్రజాస్వామ్య ప్రక్రియను గౌరవించాలని అన్ని రాజకీయ పార్టీలను కలెక్టర్ కోరారు. ఎన్నికలను శాంతియుతంగా, నిష్పాక్షికంగా నిర్వహించేందుకు జిల్లా యంత్రాంగం పూర్తి స్థాయిలో కట్టుబడి ఉందని వెల్లడించారు.ఈ కార్యక్రమంలో జిల్లా స్థానిక సంస్థల అదనపు కలెక్టర్ బి. రాజ గౌడ్, స్పెషల్ ఆఫీసర్లు, నోడల్ అధికారులు, మున్సిపల్ కమిషనర్లు, పోలీసు అధికారులు, సంబంధిత శాఖల అధికారులు తదితరులు పాల్గొన్నారు._________