జగిత్యాలలో ‘రాజకీయ’ జగడం.!!

• ఎం.ఎల్.సీ జీవన్ రెడ్డి రాజకీయాలకు గుడ్ బై.?
• కాంగ్రెస్ పార్టీలో ‘చిచ్చు’రేపిన ఎమ్మెల్యే సంజయ్ చేరిక
• బుజ్జగింపుల కోసం కదిలిన కాంగ్రెస్ పెద్దలు
• కాంగ్రెస్ పార్టీకి సరిపోయేంత బలమున్నా చేరికలెందుకన్న జీవన్ రెడ్డి
• బీజేపీ తీర్థం పుచ్చుకుంటాడంటూ మరో వార్త చక్కర్లు
• జీవన్ రెడ్డి వెంట మరికొందరు రాజీనామా.?
• జిల్లాలో రాజుకున్న రాజకీయ మంటలు

నేటి సాక్షి, కోరుట్ల: తెలంగాణలో పాలిటిక్స్.. ఇంట్రెస్టింగ్‌గా మారాయి. రెండు రోజు వ్యవధిలోనే ఇద్దరు బీఆర్ఎస్ ఎమ్మెల్యేలు కాంగ్రెస్ కండువా కప్పుకున్నారు. కాగా.. ఈ ఇద్దరు ఎమ్మెల్యేల చేరికపై కాంగ్రెస్ ఎమ్మెల్సీ జీవన్ రెడ్డి తీవ్ర అసంతృప్తి వ్యక్తం చేస్తున్నారు. తన నియోజకవర్గ ఎమ్మెల్యేను పార్టీలో చేర్చుకుంటున్నప్పుడు కనీసం సమాచారం ఇవ్వకపోవటంపై తీవ్ర మనస్తాపానికి గురైనట్టు తెలుస్తోంది. ఈ క్రమంలో.. ఆయన సంచలన నిర్ణయం తీసుకోనున్నట్టు సమాచారం. తెలంగాణలో రాజకీయాలు ఆసక్తికరంగా మారాయి. పార్లమెంట్ ఎన్నికల తర్వాత సమీకరణాలు వేగంగా మారుతున్నాయి. ఆపరేషన్ ఆకర్ష్‌కు తెరలేపిన కాంగ్రెస్.. వరుసగా బీఆర్ఎస్ ఎమ్మెల్యేలను హస్తం గూటికి చేర్చుకుంటోంది. ఈ క్రమంలోనే.. మాజీ స్పీకర్, బాన్సువాడ ఎమ్మెల్యే పోచారం శ్రీనివాస్ రెడ్డి కాంగ్రెస్ పార్టీలో (జూన్ 22న) చేరగా.. ఆ వెంటనే జగిత్యాల ఎమ్మెల్యే డాక్టర్ సంజయ్ కుమార్ కూడా (జూన్ 23న) హస్తం గూటికి చేరిపోయారు. బీఆర్ఎస్‌ఎల్పీ విలీనమే లక్ష్యంగా కాంగ్రెస్ పార్టీ పావులు కదుపుతున్నట్టుగా వార్తలు వస్తుండగా.. రాష్ట్ర నాయకత్వం చేస్తున్న ఈ పనిపై ఎమ్మెల్సీ తాటిపర్తి జీవన్ రెడ్డి తీవ్ర అసంతృప్తితో ఉన్నట్టు తెలుస్తోంది. పోచారం శ్రీనివాస్ రెడ్డి చేరికపైన మీడియా ముఖంగానే జీవన్ రెడ్డి తీవ్ర అభ్యంతరం వ్యక్తం చేశారు. తమ పార్టీకి సరిపోయినంత మెజార్టీ ఉందని.. మిగతా పార్టీల ఎమ్మెల్యేలను చేర్చుకోవాల్సిన అవసరం లేదని చెప్పిన జీవన్ రెడ్డి.. ఇలాంటి పనులను తాను ప్రోత్సహించనని చెప్పుకొచ్చారు. పోచారం చేరిక పూర్తిగా అవకాశవాదానికి నిదర్శనంగా అభివర్ణించారు. జీవన్ రెడ్డి ఈ వ్యాఖ్యలు చేసిన కొద్ది గంటలకే.. జగిత్యాల బీఆర్ఎస్ ఎమ్మెల్యే డాక్టర్ సంజయ్ కుమార్.. రేవంత్ రెడ్డి సమక్షంలో కాంగ్రెస్ కండువా కప్పుకోవటం గమనార్హం.
తన సొంత నియోజకవర్గానికి చెందిన ఎమ్మెల్యేను పార్టీలో చేర్చుకోవటంపై కనీస సమాచారం కూడా లేకపోవటంపై జీవన్ రెడ్డి తీవ్ర అసంతృప్తి వ్యక్తం చేస్తున్నారు. అంతేకాకుండా.. తనను రెండుసార్లు ఓడించిన తన ప్రత్యర్థిని పార్టీలో చేర్చుకోవటం కూడా తనకు ఎంత మాత్రం ఇష్టం లేదని కూడా తెలుస్తోంది. దీంతో.. తీవ్ర ఆగ్రహంగా ఉన్న జీవన్ రెడ్డి సంచలన నిర్ణయం తీసుకోనున్నట్టు తెలుస్తోంది. ఇప్పటికే.. బుజ్జగింపులు జరుగుతుండగా.. తన భవిష్యత్ కార్యాచరణపై ముఖ్య అనుచరులతో జీవన్ రెడ్డి చర్చించారు.జీవన్ రెడ్డి ఇంటికి వెళ్లిన ప్రభుత్వ విప్ ఆది శ్రీనివాస్.. ఆయనకు నచ్చజప్పే ప్రయత్నం చేశారు. ఈ సందర్భంగా.. 40 ఏళ్లుగా రాజకీయం చేశానని.. ఇక చాలని జీవన్ రెడ్డి చెప్పినట్టు సమాచారం. పార్టీకి రాజీనామా చేసి.. వ్యవసాయం చేసుకుంటానని సన్నిహితులతో చెప్పినట్టు తెలుస్తోంది. దీంతో… ఆయన ఏం నిర్ణయం తీసుకోనున్నారన్నది ఉత్కంఠగా మారింది.కాగా.. జీవన్ రెడ్డి రెండుసార్లు సంజయ్ చేతిలో ఓడిపోయారు. అసెంబ్లీ ఎన్నికల్లో ఓడిపోయిన తర్వాత.. లోక్ సభ ఎన్నికల్లోనూ పోటీ చేశారు జీవన్ రెడ్డి. ఈ సందర్భంగా ప్రచారంలో పాల్గొన్న రేవంత్ రెడ్డి.. జీవన్ రెడ్డి గెలిస్తే.. కేంద్రంలో వ్యవసాయ శాఖ మంత్రి పదవి ఇప్పిస్తానంటూ చెప్పటం గమనార్హం. ఇదిలా ఉంటే.. 70 ఏళ్లు దాటిన జీవన్ రెడ్డి.. ఇవే తనకు చివరి ఎన్నికలంటూ.. అసెంబ్లీ, పార్లమెంట్ ఎన్నికల సమయంలో పదే పదే చెప్తూ వచ్చారు.

గౌరవంగా రాజకీయాల్లోంచి తప్పుకుంటా..?
జగిత్యాల లో రాజకీయాలు వేగంగా మారుతున్నాయి. కాంగ్రెస్ పార్టీ అంటే జీవన్ రెడ్డి.. జీవన్ రెడ్డి అంటేనే కాంగ్రెస్ పార్టీ అనేది చారిత్రక ముద్ర. ఇలాంటి జగిత్యాల కాంగ్రెస్ పార్టీలో అల్లకల్లోలం మొదలైంది. 2014 నుంచి జగిత్యాల అసెంబ్లీ బరిలో బీఆర్ఎస్..కాంగ్రెస్ పార్టీల ప్రత్యర్థులుగా నిలిచిన డా. సంజయ్ కుమార్..టి. జీవన్ రెడ్డిలు ఒకే కాంగ్రెస్ పార్టీ నాయకులుగా మారారు. ఆదివారం రాత్రి బీఆర్ఎస్ జగిత్యాల ఎమ్మెల్యే డా. సంజయ్ కుమార్ అనూహ్యంగా హైదరాబాద్లో సీఎం రేవంత్ రెడ్డి సమక్షంలో కాంగ్రెస్ పార్టీ కండువా కప్పుకొన్నారు. దీంతో జగిత్యాల కాంగ్రెస్ లో తీవ్ర ఆందోళన పెరిగింది. 40 ఏండ్ల సుదీర్ఘ రాజకీయం అధికాస్తా కాంగ్రెస్ పార్టీనే నమ్ముకొని రాజకీయాలను నడిపిన ఎమ్మెల్సీ జీవన్ రెడ్డికి పెద్ద కుదుపుగా మారింది.
తెలంగాణ రాష్ట్ర ఆవిర్భావ పోరాట సమయంలో కరీంనగర్ ఎంపీగా కేసీఆర్ పైనే పోటీచేసిన జీవన్ రెడ్డి కాంగ్రెస్ గడ్డు పరిస్తితులో ఉన్నా అధికార బీఆర్ఎస్ ప్రభుత్వ వైఫల్యాలను గత పడేండ్లుగా ఎండగడుతూ వచ్చాడు. కానీ బీఆర్ ఎస్ ఎమ్మెల్యే డా. సంజయ్ కుమార్ కారు దిగి కాంగ్రెస్ ఖండువా కప్పుకోవడం తన సుదీర్ఘ రాజకీయాల్లో అతిగా బాధించిన విషయమంటూ తన సన్నిహితులతో జీవన్ రెడ్డి చెప్పుకొచ్చినట్లు తెలిసింది.

గౌరవంగా రాజకీయాల్లోంచి తప్పుకుంటా
గత 40 ఏండ్లుగా కాంగ్రెస్ పార్టీనే నమ్ముకొని రాజకీయాలు నెరిపానని తనకు కనీస సమాచారం ఇవ్వకుండా బీఆర్ ఎస్ ఎమ్మెల్యేను కాంగ్రెస్ పార్టీలో చేర్చుకోవడం తనను చాలా బాధించిదని జీవన్ రెడ్డి ముఖ్య కార్యకర్తలతో, సన్నిహితులతో అన్నట్లు తెలిసింది. గౌరవంగా రాజకీయం చేశానని గౌరవంగా రాజకీయాల్లోంచి తప్పుకొంటా నని పట్టభద్రుల ఎమ్మెల్సీ పదవికి రాజీనామా చేస్తానని గట్టి పట్టుదలతో జీవన్ రెడ్డి ఉన్నట్లు కాంగ్రెస్ శ్రేణుల్లోనే ప్రచారం జరుగుతోంది. ఇదే విషయంపై కొందరు మీడియా ప్రతినిధులతో ఇదే జవాబు జీవన్ రెడ్డి ఇచ్చినట్లు సమాచారం. అయితే కేవలం పట్టభద్రుల ఎమ్మెల్సీ పదవికి మాత్రమే తన రాజీనామా ఉంటుందని పేర్కొంటున్న జీవన్ రెడ్డి ప్రధానిగా రాహుల్ గాంధీని కుర్చీలో చూసేవరకు కాంగ్రెస్ పార్టీలోనే ఉంటానని జీవన్ రెడ్డి పార్టీ ముఖ్యులతో, పార్టీ క్యాడర్తో ఎమ్మెల్సీ జీవన్ రెడ్డి అన్నట్లు సమాచారం.

దుమారం లేపిన జీవన్ రాజీనామా
తన ఎమ్మెల్సీ పదవికి జీవన్ రెడ్డి రాజీనామా చేస్తారన్నటు మీడియాలో వచ్చిన సమాచారం కాస్తా రాష్ట్ర వ్యాప్తంగా దుమారం లేపింది. ఈ ముచ్చట తెలిసిన వెంటనే కాంగ్రెస్ పార్టీ రాష్ట్ర వ్యవహారాల ఇంచార్జ్ దీప్ దాస్ మున్షి తో సహా మంత్రి శ్రీధర్ బాబు తో సహా ఇతర కాంగ్రెస్ పెద్దలు రంగంలోకి దిగి రాజీనామా అంశాన్ని విరమించుకోవాలని, సముచిత స్థానం కల్పిస్తామని భరోసా కల్పించినట్లు తెలిసింది. అలాగే ప్రభుత్వ విప్ లు అడ్లూరి లక్ష్మన్ కుమార్, ఆది శ్రీనివాస్ లు నేరుగా జీవన్ రెడ్డి నివాసానికి వచ్చి రాజీనామా అంశాన్ని ఉపసంహరించుకోవాలని కోరినట్లు తెలిసింది. మధ్యాహ్నం ఒంటి గంటవరకె తెలంగాణలో జగిత్యాల అంశం పెద్ద చర్చకు దారితీయడం గమనార్హం.

జీవన్ ఇంటికి క్యూ కట్టిన కాంగ్రెస్ నేతలు.. కార్యకర్తలు
జగిత్యాల ఎమ్మెల్యే డా. సంజయ్ కుమార్ కాంగ్రెస్ పార్టీలో చేరారన్న వార్త ఆదివారం అర్ధరాత్రి నుంచి జగిత్యాలలో జోరుగా చర్చల్లోకి చేరింది. తెల్లవారాక జగిత్యాల లో ఎక్కడ చూసినా ఇదే ముచ్చట. ఇదిలా ఉంటె డా. సంజయ్ కాంగ్రెస్ పార్టీలో చేరడం నచ్చని సీనియర్ కాంగ్రెస్ శ్రేణులు ఆదివారం అర్ధరాత్రి నిరసనలు చేపట్టారు. కాగా సోమవారం ఉదయం నుంచే జగిత్యాల లోని జీవన్ రెడ్డి నివాసానికి జిల్లాలోని కాంగ్రెస్ వాదులు, కాంగ్రెస్ శ్రేణులు క్యూకట్టారు. పోలీస్ స్టేషన్ ముందే పెద్ద వాహనాలు జీవన్ రెడ్డి ఇంటివైపు వెళ్లకుండా పోలీసు స్టేషన్ ఎదురుగానే బారికేడ్లు ట్రాఫిక్ పోలీసులు ఏర్పాటు చేశారంటేనే కాంగ్రెస్ నేతల తాకిడి ఏ స్థాయిలో ఉందొ ఇట్లే అర్థం చేసుకోవచ్చు.

రాజకీయాలకు జీవన్ రెడ్డి గుడ్ బై?
జగిత్యాల జిల్లా కాంగ్రెస్లో రాజకీయ పరిమాణాలు మారుతున్నాయి. జగిత్యాల ఎమ్మెల్యే సంజయ్ కుమార్ కాంగ్రెస్ పార్టీలో చేరికపై పట్టభద్రుల ఎమ్మెల్సీ జీవన్ రెడ్డి గుర్రుగా ఉన్నారు. సంజయ్ చేరిక గురించి తెలపకపోవడం, తన ప్రత్యర్ధిని పార్టీలోకి తీసుకోవడటం పట్ల జీవన్ రెడ్డి అధిష్ఠానంపై ఆగ్రహంతో ఉన్నారు.

ఎమ్మెల్సీ పదవికి కూడా..
ఎమ్మెల్సీ పదవికి రాజీనామా యోచనలో ఉన్నట్లు, రాజకీయాలకు స్వస్తి చెప్పి, వ్యవసాయం చేసుకుంటానని సన్నిహితులతో చెప్పినట్లు సమాచరం, జీవన్ రెడ్డి అలక గురించీ తెలుసుకున్న మంత్రి శ్రీధర్ బాబు, ప్రభుత్వ విప్ లక్ష్మణ్ కుమార్ లు ఎమ్మెల్సీ జీవన్ రెడ్డి ఇంటికి చేరి ఆయనతో మాట్లాడారు. ఎలాంటి నిర్ణయం తీసుకోవద్దని , కాంగ్రెస్ పార్టీకి మీరు చేసిన సేవలు అమోఘం అని, మీ సేవలు రాష్ట్ర ప్రజలకూ ఎంతో అవసరం అని అన్నారు.

జోరుగా మంతనాలు
ఉప ముఖ్యమంత్రి బట్టి, మంత్రి ఉత్తమ్ ఫోన్ లో మాట్లాడినట్లు సన్నిహితులు చెబుతున్నారు. జగిత్యాల జిల్లా కాంగ్రెస్ కూ పెద్ద దిక్కుగా ఉన్న జీవన్ రెడ్డి రాజీనామా జిల్లాలో, రాష్ట్రంలో హాట్ టాపిక్ గా మారింది. కాంగ్రెస్ ప్రభుత్వ పెద్దల మాట విని రాజీనామా నిర్ణయాన్ని వెనక్కి తీసుకుంటారో.. లేక రాజీనామా చేసి, రాజకీయాలకు గుడ్ బై చెబుతారో చూడాలి.

కిసాన్ కాంగ్రెస్ రాష్ట్ర కో ఆర్డినేటర్ పదవికి వాకిటి సత్యం రెడ్డి రాజీనామా
కాంగ్రెస్ లో కొత్తగా వచ్చి చేరుతున్న బీఆర్ఎస్ నేతలు అప్పుడే పార్టీలో ముసలం పుట్టిస్తున్నారు. రాజకీయ ప్రత్యర్థులు చేరిన పార్టీలో తామెలా కొనసాగుతామని రాజీనామాలకు తెగబడుతున్నారు కాంగ్రెస్ సీనియర్లు. ఇంతకాలం తామంతా కొట్లాడిన బీఆర్ఎస్ నేతలతోనే రోజూ రాసుకుపూసుకు తిరగటం కుదరదని, తమ ప్రత్యర్థులే తమ సొంత పార్టీలో చేరితే ఊరుకోలేమని వీరంతా తిరుగుబావుటా ఎగరేసే స్థితికి వచ్చి, ఏకంగా రాజీనామాలు చేసేస్తున్నారు.

జీవన్ రెడ్డికి మద్దతుగా రాజీనామాలు..
ఓవైపు సీనియర్ నేత జీవన్ రెడ్డి తన నిర్ణయాన్ని ప్రకటించి తెలంగాణ కాంగ్రెస్ లో ప్రకంపనలు సృష్టించగా తాజాగా వాకిటి సత్యం కూడా జీవన్ రెడ్డి బాటలో పయనిస్తున్నారు. జగిత్యాల ఎమ్మెల్యే సంజయ్ కుమార్ కాంగ్రెస్ పార్టీలో చేరికను నిరసిస్తూ ఎమ్మెల్సీ జీవన్ రెడ్డికి మద్దతుగా కిసాన్ కాంగ్రెస్ రాష్ట్ర కో ఆర్డినేటర్ పదవికి వాకిటి సత్యం రెడ్డి రాజీనామా చేశారు.
సాధారణ కార్యకర్తగా ఉంటానని రాజీనామా పత్రాన్ని కిసాన్ కాంగ్రెస్ రాష్ట్ర అధ్యక్షుడికి పంపారు. ఈ సందర్బంగా వాకిటి సత్యం రెడ్డి మాట్లాడుతూ, ఎమ్మెల్సీ జీవన్ రెడ్డికి సంజయ్ చేరిక తెలియపోవడం, ఆయన చేరిక ఎమ్మెల్సీ జీవన్ రెడ్డినీ అవమానించడమే అవుతుందనీ, పార్టీని బ్రతికించిన నాయకుడికి అగౌరవమే మిగిలిందని వాకిటి సత్యం రెడ్డి అన్నారు. చేరిక విషయంలో ప్రభుత్వ పెద్దలు పునరాలోచించాలని,జీవన్ రెడ్డికీ ప్రభుత్వంలో మంత్రిగా అవకాశం కల్పించాలని కోరారు.

జగిత్యాలలో ఎమ్మెల్యే సంజయ్ దిష్టిబొమ్మ దగ్ధం
కారు దిగి కాంగ్రెస్ పార్టీలో చేరిన జగిత్యాల బీఆర్ ఎస్ ఎమ్మెల్యే డా. సంజయ్ కుమార్ పై ఆపార్టీ నాయకులు, కార్యకర్తలు అగ్గిబుగ్గయారు. సోమవారం బీఆర్ఎస్ పార్టీ కార్యాలయంలో జిల్లా పార్టీ అధ్యక్షులు కల్వకుంట్ల విద్యాసాగర్ రావు అధ్యక్షతన బీఆర్ ఎస్ పార్టీ సమావేశం జరిగింది. ఇందులో డా. సంజయ్ కుమార్ కాంగ్రెస్ పార్టీలో చేరడంపై తీవ్రంగా మండిపడ్డారు. అనంతరం స్థానిక తహశీల్దార్ చౌరస్తాలో డా. సంజయ్ చర్యకు నిరసన కార్యక్రమాన్ని చేపట్టారు. అనంతరం దిష్టిబొమ్మను దగ్ధం చేశారు. ఈ సందర్భంగా జడ్పి చైర్మన్ దావా వసంత, మాజీ మంత్రి ఈశ్వర్, జిల్లా అధ్యక్షులు విద్యాసాగర్ రావుతోపాటు పలువురు మాట్లాడుతూ జీరో స్థాయిలో ఉన్న డా. సంజయ్ కుమార్ కు బీఆర్ ఎస్ పార్టీ జవసత్వాలు నింపిందని స్వార్థ ప్రయోజనాలకోసం కాంగ్రెస్ పార్టీలో చేరడం తల్లి పాలు తాగి రొమ్ము గుద్దడమేనని అన్నారు. నిజంగా దమ్ముంటే ఎమ్మెల్యే పదవికి డా. సంజయ్ కుమార్ రాజీనామా చేసి తిరిగి ఎన్నికల్లో పోటీ చేయాలని సవాల్ విసిరారు. కొందరు బీఆర్ ఎస్ కార్యకర్తలు నేరుగా అశోక్ నగర్ లోని డా. సంజయ్ ఇంటిలోకి చొచ్చుకొనిపోయి రాజీనామా చేయాలంటూ నినాదాలు చేశారు. ఏకంగా కొందరు రాజీనామా చేయాలంటూ స్టిక్కర్లు అతికించారు. పోలిస్ లు జోక్యం చేసుకొని ఆందోళనకారులను చెదరగొట్టారు.