హెడ్లైన్ : డాక్టర్ బాబు జగ్జీవన్ రామ్ సేవలు దళిత సమాజానికి మార్గదర్శకం

నేటి సాక్షి న్యూస్ జూలై 06




పెద్దకడుబూరు భారత మాజీ ఉప ప్రధానమంత్రి, ప్రముఖ దళిత నాయకుడు డాక్టర్ బాబు జగ్జీవన్ రామ్ 40వ వర్ధంతిని జై భీమ్ ఎమ్మార్పీఎస్ ఆధ్వర్యంలో సోమవారం ఘనంగా నిర్వహించారు. పెద్దకడుబూరు మండల జై భీమ్ ఎమ్మార్పీఎస్ అధ్యక్షుడు మంచోది ఆదాము మాదిగ నివాసంలో ఏర్పాటు చేసిన కార్యక్రమంలో మండల ఉపాధ్యక్షుడు బుజ్జప్ప ఆధ్వర్యంలో జగ్జీవన్ రామ్ చిత్రపటానికి పూలమాలలు వేసి నివాళులర్పించారు.
ఈ సందర్భంగా నాయకులు మాట్లాడుతూ అణగారిన వర్గాల సామాజిక, ఆర్థిక, రాజకీయ అభ్యున్నతి కోసం జీవితాంతం పోరాడిన మహోన్నత నాయకుడు డాక్టర్ బాబు జగ్జీవన్ రామ్ అని కొనియాడారు. దాదాపు ఐదు దశాబ్దాల రాజకీయ జీవితాన్ని ప్రజాసేవకు అంకితం చేసిన ఆయన, దేశ రాజకీయాల్లో విశిష్ట స్థానాన్ని సంపాదించారని పేర్కొన్నారు. దళితుల హక్కుల పరిరక్షణ, సామాజిక న్యాయం కోసం ఆయన చేసిన కృషి దేశ చరిత్రలో చిరస్థాయిగా నిలిచిపోయిందన్నారు.
డాక్టర్ బాబాసాహెబ్ అంబేద్కర్ చూపిన మార్గంలో నడుస్తూ దళిత, గిరిజన వర్గాల అభివృద్ధికి జగ్జీవన్ రామ్ విశేషంగా కృషి చేశారని తెలిపారు. ప్రజల సంక్షేమం కోసం అంకితభావంతో పనిచేసిన ఆయన రాజకీయ జీవితంలో నిబద్ధత, నిజాయితీకి ప్రతీకగా నిలిచారని పేర్కొన్నారు. నేటి తరానికి ఆయన జీవితం ఆదర్శప్రాయమని, ఆయన ఆశయాలు సమాజ నిర్మాణానికి మార్గదర్శకంగా నిలుస్తాయని అన్నారు. రాబోయే రోజుల్లో డాక్టర్ బాబు జగ్జీవన్ రామ్ ఆశయాలు, సేవలను ప్రజల్లోకి మరింత విస్తృతంగా తీసుకెళ్లేందుకు జై భీమ్ ఎమ్మార్పీఎస్ కృషి చేస్తుందని నాయకులు తెలిపారు.
ఈ కార్యక్రమంలో ఎం. ప్రభాకర్, జె. పాగుంటి, కె. ఆదామ్, ఎం. ఆనంద్, జి. రాజు తదితరులు పాల్గొని జగ్జీవన్ రామ్‌కు ఘన నివాళులర్పించారు.