*...తెరల వెనుక బందీ అవుతున్న మనిషి డిజిటల్ ప్రపంచంపై నిరుడు సర్వేష్ ముదిరాజ్* *.సామాజిక బంధాలను దూరం చేస్తున్న స్మార్ట్‌ఫోన్ సంస్కృతి* *.మానవత్వమే సమాజానికి అసలైన వంతెన తెలంగాణ రక్షణ సేన పార్టీ నాయకుడు నిరుడు సర్వేష్ ముదిరాజ్* *.రీల్స్, షార్ట్స్ మోజుతో ఆలోచనా శక్తి క్షీణిస్తోంది* *.యాంత్రిక జీవనం నుంచి మానవీయ కోణంలోకి మళ్లాలని తెలంగాణ రక్షణ సేన పార్టీ నిరుడు సర్వేష్ ముదిరాజ్ పిలుపు* *.తెరల వెనుక బందీ అవుతున్న మనిషి* *.సాంకేతిక ప్రగతితో పాటు సామాజిక బంధాలు బలహీనపడుతున్నాయన్న ఆందోళన*

నేటి సాక్షి శంకర్ పల్లి , జూన్ 12 ( సుధాకర్ గౌడ్):


ఆధునిక యుగంలో సాంకేతికత మనిషి జీవితాన్ని ఎంతో సులభతరం చేసినప్పటికీ, అదే సమయంలో మానవ సంబంధాలను బలహీనపరుస్తోందని తెలంగాణ రక్షణ సేన పార్టీ రాజేంద్రనగర్ నియోజకవర్గం సీనియర్ నాయకుడు నిరుడు సర్వేష్ ముదిరాజ్ ఆందోళన వ్యక్తం చేశారు. ప్రపంచం మొత్తం మన అరచేతిలోకి వచ్చేసినప్పటికీ, మన పక్కనే ఉన్న మనిషితో అనుబంధం క్రమంగా దూరమవుతోందని ఆయన పేర్కొన్నారు.నెట్‌వర్క్ సిగ్నల్ బలంగా ఉన్న చోట కూడా మనుషుల మధ్య భావోద్వేగ అనుబంధాలు తెగిపోతున్నాయని అన్నారు.స్మార్ట్‌ఫోన్ తెరలపై గంటల తరబడి గడుపుతున్న నేటి తరానికి, పక్కనే ఉన్న వ్యక్తి బాధను అర్థం చేసుకునే సమయం లేకుండా పోయిందని ఆయన ఆవేదన వ్యక్తం చేశారు.సామాజిక మాధ్యమాల్లో వందలాది మంది వర్చువల్ మిత్రులు ఉన్నప్పటికీ, మనసులోని బాధను పంచుకునే ఒక నిజమైన స్నేహితుడు కూడా లేకపోవడం విచారకరమని పేర్కొన్నారు.ఈ పరిస్థితి యువతలో ఒంటరితనం, మానసిక ఆందోళనలను పెంచుతోందని ఆయన అభిప్రాయపడ్డారు.ఒకప్పుడు మనుషులు యంత్రాలను నియంత్రించేవారని, కానీ ప్రస్తుతం యంత్రాలే మనుషుల ఆలోచనలు, భావోద్వేగాలు, జీవనశైలిని ప్రభావితం చేస్తున్నాయని నిరుడు సర్వేష్ ముదిరాజ్ అన్నారు.ఇది నిజమైన పురోగమనమా లేక మానవ విలువల పతనమా అనే అంశంపై ప్రతి ఒక్కరూ ఆలోచించాల్సిన అవసరం ఉందన్నారు.ముఖ్యంగా రీల్స్, షార్ట్స్ వంటి క్షణిక వినోదాలపై పెరుగుతున్న మోజు యువతలో లోతైన ఆలోచనా శక్తిని దెబ్బతీస్తోందని తెలిపారు.కృత్రిమ మేధస్సు (ఏఐ) వంటి ఆధునిక సాంకేతికతలు పనులను సులభతరం చేస్తున్నప్పటికీ, వాటిపై అతిగా ఆధారపడటం వల్ల మానవ మేధస్సులోని సృజనాత్మకత తగ్గిపోతోందని ఆయన హెచ్చరించారు.సమాచారాన్ని వేగంగా అందించే ఈ సాంకేతిక సాధనాలు, మనిషిలో ఉండాల్సిన పరిశీలన, విశ్లేషణ, సృజనాత్మక ఆలోచనలను క్రమంగా మందగింపజేస్తున్నాయని పేర్కొన్నారు.సమాజంలో జరుగుతున్న పరిణామాలు మరింత ఆందోళన కలిగిస్తున్నాయని ఆయన అన్నారు.రోడ్డుపై ప్రమాదం జరిగినప్పుడు బాధితుడిని కాపాడే ప్రయత్నం చేయడం కంటే, ఫోన్ తీసి వీడియో చిత్రీకరించాలనే ధోరణి పెరుగుతోందని విమర్శించారు.“ఏం జరిగితే మాకేంటి” అనే నిర్లక్ష్య భావన, సామాజిక బాధ్యతల పట్ల ఉదాసీనత, మానవీయ స్పందనల లోపం వంటి లక్షణాలు డిజిటల్ యుగం ప్రభావంతో పెరుగుతున్నాయని తెలిపారు.ఇకనైనా ప్రతి ఒక్కరూ మేల్కొని డిజిటల్ బంధనాల నుంచి బయటపడాలని నిరుడు సర్వేష్ ముదిరాజ్ పిలుపునిచ్చారు.కొంత సమయమైనా ఫోన్లను పక్కనపెట్టి పిల్లలతో ముచ్చటించాలని, వృద్ధుల మాటలు వినాలని, సమాజం పట్ల కరుణా భావంతో ముందుకు రావాలని సూచించారు.గోడలను కాదు, మనుషుల మధ్య వంతెనలను నిర్మించే మానవత్వమే నేటి సమాజానికి అత్యంత అవసరమని, యాంత్రిక జీవనం నుంచి మానవీయ జీవన విధానంలోకి తిరిగి రావాలని, మనిషిని మనిషిగా ప్రేమించే సంస్కృతిని పెంపొందించాలని ఆయన కోరారు.