అత్యవసర సమయంలో అంబులెన్స్ లేక ప్రజల ప్రాణాలతో చెలగాటం. పట్టణాలకే పరిమితం అవుతున్న 108 అంబులెన్సు. పర్యవేక్షించవలసిన అధికారులు...?

నేటి సాక్షి వికారాబాద్ :

వికారాబాద్ జిల్లాలో అత్యవసర వైద్య సేవల కోసం ఏర్పాటు చేసిన 108 అంబులెన్స్ సేవలు ప్రజలకు అందుబాటులో లేకపోవడంతో గ్రామీణ ప్రాంతాల ప్రజలు తీవ్ర ఇబ్బందులు ఎదుర్కొంటున్నారు. ముఖ్యంగా గ్రామాల్లో అత్యవసర పరిస్థితులు ఏర్పడినప్పుడు సమయానికి అంబులెన్స్ అందక ప్రాణనష్టం జరిగే ప్రమాదం నెలకొంది.
వికారాబాద్ ప్రభుత్వ ఆసుపత్రికి కేటాయించిన 108 అంబులెన్స్‌లను హైదరాబాద్ మహానగరానికి రోగులను తరలించడానికి ఎక్కువగా వినియోగించడం వల్ల స్థానిక ప్రజలకు అవసరమైన సమయంలో అంబులెన్స్ సేవలు అందడం లేదని ప్రజలు ఆవేదన వ్యక్తం చేస్తున్నారు.
గ్రామీణ ప్రాంతాల్లో ప్రమాదాలు, గర్భిణీల అత్యవసర పరిస్థితులు, గుండెపోటు వంటి కేసుల్లో అంబులెన్స్ ఆలస్యంగా రావడం వల్ల రోగుల ప్రాణాలు ప్రమాదంలో పడుతున్నాయని స్థానికులు పేర్కొంటున్నారు. జిల్లా అధికార యంత్రాంగం ఈ సమస్యపై వెంటనే స్పందించి గ్రామీణ ప్రాంతాలకు అదనపు 108 అంబులెన్స్‌లను కేటాయించాలని ప్రజలు డిమాండ్ చేస్తున్నారు.
ప్రజల ప్రాణాలకు సంబంధించిన ఈ కీలక అంశాన్ని ప్రభుత్వం, వైద్య ఆరోగ్య శాఖ అధికారులు అత్యంత ప్రాధాన్యతతో పరిగణించి తక్షణ చర్యలు తీసుకోవాలని ప్రజలు కోరుతున్నారు.