హెడ్లైన్ : ఓటర్ల జాబితా సవరణపై తహసీల్దార్‌ను కలిసిన వైఎస్సార్‌సీపీ నాయకులు _ అర్హులందరికీ ఓటు హక్కు కల్పించాలని విజ్ఞప్తి

నేటి సాక్షి న్యూస్ జూన్ 17




కౌతాళం ఓటర్ల ప్రత్యేక సమగ్ర సవరణ కార్యక్రమంలో భాగంగా జరుగుతున్న ఇంటింటా సర్వేపై కౌతాళం మండల వైఎస్సార్‌సీపీ నాయకులు బుధవారం తహసీల్దార్‌ను కలిసి వివరాలు తెలుసుకున్నారు. ఎమ్మెల్యే వై. బాలనాగిరెడ్డి ఆదేశాల మేరకు వైఎస్సార్‌సీపీ నాయకుడు దేశాయి ప్రహ్లాద ఆచారి ఆధ్వర్యంలో ఈ కార్యక్రమం నిర్వహించారు.
ఈ సందర్భంగా గ్రామాల వారీగా ఓటర్ల జాబితాల పరిశీలన, ఇంటింటా సర్వే నిర్వహణ, కొత్త ఓటర్ల నమోదు, మార్పులు, చేర్పులు, తొలగింపుల ప్రక్రియపై అధికారులతో చర్చించారు. ఓటర్ల జాబితాలో ఉన్న లోపాలను సరిదిద్దడంతో పాటు ప్రజలకు ఎలాంటి ఇబ్బందులు కలగకుండా చర్యలు తీసుకోవాలని కోరారు.
డూప్లికేట్‌గా నమోదైన ఓట్లను, అక్రమంగా చేర్చిన ఓట్లను తొలగించి, అర్హత కలిగిన ప్రతి ఒక్కరికీ ఓటు హక్కు కల్పించేలా అధికారులు ప్రత్యేక దృష్టి సారించాలని నాయకులు సూచించారు. ప్రజాస్వామ్య వ్యవస్థ బలోపేతానికి ఖచ్చితమైన ఓటర్ల జాబితా ఎంతో అవసరమని పేర్కొన్నారు.
అలాగే గ్రామాల్లో ప్రజల నుంచి వస్తున్న అభ్యంతరాలు, వినతులను పరిశీలించి తగిన చర్యలు చేపట్టాలని తహసీల్దార్‌ను కోరారు. ఈ కార్యక్రమంలో మండల ఉపాధ్యక్షుడు వెంకటరామిరెడ్డి, పార్టీ నాయకులు, ఓటర్ల జాబితా ప్రతినిధులు, గ్రామ స్థాయి నాయకులు తదితరులు పాల్గొన్నారు.