*స్నేహబంధం సజీవమని చాటిన మిత్రులు* * అశోక్ కుటుంబానికి అండగా రూ.63 వేల సహాయం * ఎస్‌ఎస్‌సీ 1995–96 మిత్రబృందం మానవీయ స్పందన

*నేటి సాక్షి, ఎండపల్లి:* స్నేహబంధం కాలంతో మసకబారదని, ఆపదలోనే నిజమైన స్నేహితుల విలువ తెలుస్తుందని ఎస్‌ఎస్‌సీ 1995–1996 మిత్రబృందం మరోసారి చాటిచెప్పింది. కొత్తపేట గ్రామానికి చెందిన తమ సహచరుడు కోమటిపల్లి అశోక్ ఆకస్మిక మరణం మిత్రబృందాన్ని తీవ్ర విషాదంలో ముంచెత్తింది. అశోక్ కుటుంబం కష్టకాలంలో ఒంటరిగా ఉండకూడదనే ఉద్దేశంతో మిత్రులంతా ఒక్కటై వారికి అండగా నిలవాలని నిర్ణయించారు. ఈ మేరకు స్వచ్ఛందంగా విరాళాలు సేకరించి మొత్తం రూ.63 వేల ఆర్థిక సహాయాన్ని అశోక్ కుటుంబ సభ్యులకు అందజేశారు. ఈ సందర్భంగా మిత్రులు మాట్లాడుతూ, చిన్ననాటి నుంచి కొనసాగుతున్న స్నేహబంధం జీవితాంతం కొనసాగుతుందని, అశోక్ లేని లోటు ఎప్పటికీ పూడ్చలేనిదని ఆవేదన వ్యక్తం చేశారు. ఆయన కుటుంబ సభ్యులకు ప్రగాఢ సానుభూతి తెలియజేస్తూ, భవిష్యత్తులో కూడా అవసరమైన ప్రతి సందర్భంలో తమవంతు సహకారం అందిస్తామని హామీ ఇచ్చారు. ఆపదలో మిత్రుడి కుటుంబానికి అండగా నిలవడం సామాజిక బాధ్యతతో పాటు మానవత్వానికి నిదర్శనమని పేర్కొన్నారు. ఈ కార్యక్రమంలో ఎస్.బ్రహ్మానందం, బి.రవీందర్, ఎస్.సంతోష్ కుమార్, టీ.రాజేశం, ఎండి.రఫీక్, కె.గంగాధర్, ఎం.కౌశిక్ కుమార్, సిహెచ్.రాజమౌళి, పి.రవీందర్, జి.నగేష్ తదితరులు పాల్గొని అశోక్ కుటుంబానికి ఆర్థిక సహాయాన్ని అందజేశారు. మిత్రబృందం చూపిన ఈ మానవీయ స్పందనకు స్థానికులు ప్రశంసలు వ్యక్తం చేస్తూ, స్నేహానికి ఇదొక ఆదర్శప్రాయమైన ఉదాహరణగా అభివర్ణించారు.